السمك بالخضار فى الفرن
المكونات
4 سمكه سليمه متنضفه كويس اى نوع بتحبيه مياس او دنيس او قاروص او حتى بورى
مكونات التتبيله ده مهم اوى
2 ربطه شبت
4 فلفل رومى اخضر
1 ربطه كزبره خضرا
2 عود كرفس
1 فلفل حامى اخضر وده حسب رغبتك
6 فص ثوم سليم ومتقشر
نصف كوب خل
نصف كوب زيت
نصف كوب عصير ليمون
1 معلقه كمون كبيره
1 معلقه كزبره ناشفه كبيره
ملح وفلفل اسود
5 حبهان
2 معلقه مسطرده
1 معلقه معجون صلصه كبيره
نصف معلقه صغيره كركم
وهنضرب كل المكونات دى فى الخلاط مع بعضها لحد ماتنعم خالص وتتجانس
ودى هتكون التتبيله بتاع السمك
الطريقه
هنجيب السمك بعد تنظيفه كويس وبعدين نشرح بالسكينه بسيط اوى على جنب السمك من اتجاه واحد زى الصوره كده تمام ده طبعا عشان السمك يشرب من التتبيله كويس وكمان عشان شكله فى التقديم يكون جميل وكمان عشان يستوى كويس بعد كده هجيب التتبيله وهنحطها كلها على السمك وبايدينا ندخل من التتبيله دى جوه بطن السمك كويس اوى ونسيبه فى التتبيله لمده ساعه نكون جهزنا 2 بصله شرائح وكمان 2 فلفل رومى شرائح و2 حبه طماطم شرائح و4 ليمونه شرائح بالقشر بتاعها وربطه كزبره خضرا مفرومه وتبلناهم بالملح والفلفل والكمون مع نصف كوب مايه ودى هتكون الارضيه بتاع السمك فى الصينيه اللى هندخلها الفرن هنحط الخضار ده فى الصينيه ونرص السمك فوقيه وندخلها الفرن على درجه حراره 180 لمده 20 دقيقه او لحد مايستوى معانا السمك ونطلعه بعد ماياخد اللون الجميل ده ويكون استوى ونقدمه بالهنا والشفا
